ღ کچھ دل سے ღ

Apni khaatir jagay ho, soye ho
apni khaatir hansay ho, roye ho
kiss liye aaj khoye khoye ho
tum nay aansoo bohat piye apnay
tum bohat saal rah liyah apnay
Ab meray sirf meray hokar raho

husn hi husn ho, zahanat ho
ishq hoon main tou, tum mohabbat ho
tum meri bus meri amanat ho
ji liye jiss qadar jiye apnay
tum bohat saal rah liye apnay
Ab meray sirf meray hokar raho

rehtay ho ranj o ghum kay gheron main
dukh kay aasaib kay baseron main
kaisay choroon tumhain andheron main
tum ko day doonga sab diye apnay
tum bohat saal rah liye apnay
Ab meray sirf meray hokar raho

tum azal sey dukhon kay dheray ho
chahay khud ko ghamon sey ghairay ho
jab sey paida huay ho meray ho
aaj kholain gay lab siye apnay
tum bohat saal rah liye apnay
Ab meray sirf meray hokar raho

ab mujhay apnay dard sehnay do
dil ki har baat dil sey kehnay do
meri banhon main khud ko behnay do
muddaton zakham khud siye apnay
tum bohat saal rah liye apnay
Ab meray sirf meray hokar raho!!