میرے خوابوں کی بستی

~!~ میرے خوابوں کی بستی ~!~

(سیما آفتاب) 

اک خواب ہے ایسی بستی ہو
جہاں شام بھی ہنستی بستی ہو

نہ خوف کا کوئی پہرا ہو
بد وقت جہاں نہ ٹھہرا ہو

جہاں روٹی خون سے سستی ہو
اک خواب ہے ایسی بستی ہو

ظلمت کا جہاں پر راج نہ ہو
کوئی خواب جہاں تاراج نہ ہو

بس چین کی بنسی بجتی ہو
اک خواب ہے ایسی بستی ہو

نہ خون بہے نہ فاقہ ہو
مزدور جہاں پر آقا ہو

جہاں نیک سبھی کی ہستی ہو
اک خواب ہے ایسی بستی ہو

بس جائیں جا کر ہم بھی وہیں
نہ کوئی دُکھی، نہ کوئی حزیں

رحمت بھی رب کی برستی ہو
اک خواب ہے ایسی بستی ہو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔×۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اضافہ شدہ (14 اگست 2025)

اُس دیس کے گلشن مہکیں سدا

وہاں کوئل، مینا چہکیں سدا

جِس کے مالی رکھوالے ہوں

گلشن کو سجانے والے ہوں

وہاں مہک گلوں کی بستی ہو

اک خواب ہے ایسی بستی ہو